Qeveria e Danimarkës në një mbledhje me kryetarët e gjitha partive parlamentare, janë pajtuar të vazhdojnë me fazën e dytë të rihapjes së Danimarkës. Kështu informoi sot kryeministresha e Danimarkës znj. Mette Frederiksen në një konferencë për shtyp nga pallati Marienborg në Kopenhagë.
Faza e parë e rihapjes u bë me 15 prill 2020, ku u hapën gjitha institucionet shtetërore, çerdhet, kopshtet, shkollat fillore nga klasa 0 deri në të 5 dhe disa mikroveprimtari.
Në fazën e dytë, rihapja do të bëhet në dy periudha, më 11 maj dhe më 18 maj. Në fazën e dytë, rihapja do të bëhet për këto veprimtari dhe nga këto data:
- Me 11 maj do të rihapen qendrat e mëdha tregtare dhe dyqanet
- Me 18 maj do të rihapen restorantet dhe kafenetë sipas këshillave udhëzuese nga ministria e shëndetësisë
- Me 18 maj do të rihapen pas-shkollat (efterskolene) – shkollim profesional me aktivitete pas shkollës fillore
- Me 18 maj do të rihapen klasat për nxënësit e klasave të 6-ta deri në të 10-tën
- Me 18 maj do të rihapet mësimi fizik me mundësi për të hyrë në provim
- Me 18 maj do të rihapen kishat, xhamitë dhe gjitha lokalet fetare
- Me 18 maj rihapen shkollat e mesme profesionale
- Me 18 maj do të rihapen bibliotekat vetëm për të huazuar dhe për të dorëzuar libra
- Me 18 maj do të rihapen aktivitetet sportive me maksimum 10 persona në distancë
- Sportet profesionale pa publik – rihapen së shpejti
- Kopshtet zoologjike – së shpejti
Rihapja në fazën e dytë do të vazhdojë të bëhet në mënyrë graduale dhe e kontrolluar nga autoritetet daneze, duke iu përmbajtur këshillave të udhëzuesit nga Ministria e Shëndetësisë e Danimarkës.
Këshillat e udhëzuesit nga Ministria e Shëndetësisë e Danimarkës:
- Laj duart
- Mbaj distancë 2 metra
- Kollit në krah
- Rri në shtëpi nëse ke simptoma
- Shmang kontakt fizik
- Kushtojini vëmendje pastërtisë – si në shtëpi ashtu edhe në vendin e punës
Pritet edhe dy faza tjera të rihapjes në Danimarkë. Faza e tretë pritet të rihapet nga 8 qershori, ku qeveria e Danimarkës së bashku me kryetarët e partive parlamentare janë duke bërë udhëzuesin për rihapjen e kufijve të Danimarkës, ndërsa faza e katërt do të jetë pas pushimit veror ose në fillim të vitit të ardhshëm shkollor.
Nga: Bardhyl Islami
